Сенат Қазақстан Президентіне жаңа өкілеттік беретін “әкімшілік-аумақтық құрылым туралы” заңға түзетулерді қабылдады.
Заң жобасында келесі түзетулер ұсынылды:
– қаладағы аудандарды елді мекендердің құрамдас бөліктеріне жатқызу;
– халық саны 400 мыңнан астам адам болған кезде облыстық маңызы бар қалада, Республикалық маңызы бар қалада, астанада аудан құру;
– аудандық маңызы бар қаланың, кенттің және ауылдың өлшемдерін нақтылау;
– Президентке Үкіметтің ұсынуы бойынша және жергілікті өкілді және атқарушы органдардың пікірін ескере отырып, республикалық, облыстық және аудандық маңызы бар қалаларды өзге елді мекендерге қайта құру жөнінде шешім қабылдау жөнінде өкілеттік беру;
– Үкіметке республикалық, облыстық және аудандық маңызы бар қалаларды өзге елді мекендерге қайта құру туралы ұсыныс енгізу жөнінде жаңа құзырет беру;
– аудандық маңызы бар қала әкіміне аудандық маңызы бар қаланы кент, ауыл санатына жатқызу туралы ұсынысты аудандық өкілді және атқарушы органдарға енгізу бойынша өкілеттік беру.
Заң жобасы өкілді және атқарушы органдарға қалалар санатын кенттер мен ауылдарға қайта қарау бойынша Үкіметке ұсыныстар енгізу жөнінде өкілеттіктер беруді көздейді.
Бұл құжат Қазақстанның әкімшілік-аумақтық құрылысы туралы заңнаманы жетілдіруді көздейді. Құжат алдағы уақытта елді мекендердің әлеуметтік-экономикалық дамуына және азаматтардың өмір сүру сапасын жақсартуға ықпал етеді деп үміттенеміз, — деді Сенат төрағасы Мәулен Әшімбаев.
Сенаттың тұрақты комитеттерінде осы Заң жобасы бойынша ескертулер мен ұсыныстар болған жоқ. Нәтижесінде Сенат депутаттары “әкімшілік-аумақтық құрылым туралы”заңға түзетулерді бірауыздан қабылдады.
Сурет: zakon.kz
