Бүгін Қазақстан Республикасының Президенті Қасым-Жомарт Тоқаев Біріккен Ұлттар Ұйымы Бас хатшысының орынбасарлары Атул Харе мен Жан-Пьер Лакруамен кездесу өткізді. Бұл туралы Қазақстан президентінің баспасөз қызметі хабарлады.
Кездесу барысында халықаралық қауіпсіздік мәселелері талқыланды, сондай-ақ Қазақстанның БҰҰ-мен бейбітшілікті сақтаудағы өзара ынтымақтастығы мәселесіне ерекше назар аударылды.
«Қазақстан БҰҰ-ның мақсаттары мен міндеттерін ұстанады. Біз БҰҰ-ның Бас хатшысы бастамашылық еткен, атап айтқанда, бітімгершілік миссияларын өткізу аясындағы реформаларды қолдаймыз. Біз бітімгершілік қызметтің тиімділігін арттыру үшін ынтымақтастыққа дайынбыз. Өкінішке орай, қазіргі әлем өте тұрақсыз, сондықтан біздің бірлескен қызметіміз ғаламшарды тұрақты және қауіпсіз етеді деп үміттенемін», – деді Қасым-Жомарт Тоқаев.
Кездесу соңында Атул Харе БҰҰ қолдауымен бітімгершілік операцияларына қатысқаны үшін Қазақстан Республикасына алғысын білдірді.
Сурет: Tengrinews.kz
