Қазақстан Үкіметі басшысының орынбасары Роман Скляр Татарстан Республикасына барды.Бұл туралы ҚР премьер-министрінің баспасөз қызметі хабарлады.
Жұмыс сапары барысында Роман Скляр Татарстан Республикасының басшысы Рустам Миннихановпен кездесіп, World Urban Parks дүниежүзілік саябақ конгресіне қатысты.
Қазақстан премьер-министрінің ақпараты бойынша, конгресс жұмысына Австралия, Жаңа Зеландия, АҚШ, Африка, Еуропа және ТМД елдерінің мыңнан астам өкілдері қатысты.
Конгресс барысында тараптар қазіргі заманғы мегаполис өміріндегі қоғамдық кеңістік, «жасыл» аумақтарды дамыту және саябақтардың қалалық ортаға әсері мәселелерін қарастырды.
Сондай-ақ, іс-шара барысында Қазақстан мен Ресей экономиканың түрлі салаларында бірлескен жобаларды табысты жүзеге асыратыны атап өтілді.
Бұдан басқа, конгресс алаңында біздің республикамыз бен Ресей арасында қоғамдық кеңістікті қайта құру саласындағы ынтымақтастықты дамыту туралы меморандумға қол қойылды.
Қол қойылған құжатқа сәйкес,тараптар қоғамдық кеңістіктер мен қалалық ортаны дамытуға бағытталған бірлескен зерттеулер мен іс-шаралар жүргізетін болады.
