Қазақстан үкіметінің басшысы Асқар Мамин Гаагада ресми сапармен болып, Нидерланды премьер-министрі Марк Рюттемен келіссөз жүргізді. Бұл туралы ҚР премьер-министрінің баспасөз қызметі хабарлады.
Кездесу барысында екі мемлекеттің премьер-министрлері сауда-экономикалық, инвестициялық, энергетикалық, қаржы, көлік-логистикалық, ауыл шаруашылығы және ғылыми салалардағы екіжақты ынтымақтастықты дамытуға қатысты мәселелерді талқылады.
“Қазақстан Республикасының Тұңғыш Президенті Нұрсұлтан Назарбаев Қазақстанның Нидерландиямен тұрақты әріптестік қарым-қатынасының негізін қалады. Мемлекет басшысы Қасым-Жомарт Тоқаев көпвекторлы бейбітшілік сүйгіш сыртқы саясаттың сабақтастығын сақтап, екіжақты ынтымақтастықты нығайтуға ерекше көңіл бөлуде”, – деді Асқар Мамин.
Екі елдің ынтымақтастығы туралы айта келе, Мамин Нидерландия біздің республикамыздың Еуропадағы негізгі сауда-экономикалық серіктестерінің бірі болып табылатынын атап өтті. Сонымен қатар, ол 2018 жылдың қорытындысы бойынша екі мемлекет арасындағы тауар айналымының көлемі 6,5 миллиард долларды құрағанын атап өтті.
Өз кезегінде, Нидерландия премьер-министрі Асқар Маминнің ресми сапары екі мемлекет арасындағы екіжақты ынтымақтастықты одан әрі дамытуға серпін беретініне сенім білдірді.
