Қазақстан Үкіметі басшысы Асқар Мамин Моңғолия премьер-министрі Ухнаагийн Хурэлсухпен кездесу өткізді. Бұл туралы ҚР премьер-министрінің баспасөз қызметі хабарлады.
Кездесу барысында сауда-экономикалық, транзит-көлік, ауыл шаруашылығы, тау-кен және мәдени-гуманитарлық салалардағы ынтымақтастықты кеңейтуге қатысты,сонымен қатар өңірлік және халықаралық ұйымдар аясындағы өзара іс-қимыл мәселелерін талқылады.
“Қазақстан Республикасының тұңғыш Президенті Нұрсұлтан Назарбаевтың саясатының арқасында Қазақстан-Моңғол қарым-қатынасын дамыту негізі қаланды. Президент Қасым-Жомарт Тоқаев сыртқы саясаттағы сабақтастықты ұстана отырып, Моңғолиямен ынтымақтастықты тиімді дамытуға көп көңіл бөледі”, – деді Мамин.
Өз кезегінде, Моңғолия премьер-министрі біздің еліміздің Азиядағы беделін атап өтіп, оның елі Қазақстанмен ынтымақтастықты одан әрі дамытуға мүдделі екенін мәлімдеді.
Келіссөз барысында екі мемлекеттің үкімет басшылары тау-кен өнеркәсібінде, құрылыс,мал шаруашылығын өнімі және ондағы дайын өнімдерді өңдеу,кашемир, тері, сондай-ақ транзиттік-көлік саласындағы ынтымақтастықты тереңдету перспективаларын қарастырды.
Қазақстан Премьер-Министрі сұхбаттасқа 2021-2024 жылдарға арналған Қазақстан мен Монғолияның сауда-экономикалық ынтымақтастығын жандандыру бойынша жол картасының жобасын әзірлеуді ұсынды.
“Сауда-экономикалық ынтымақтастықты екі жақты кеңейту арқылы екіжақты сауданың барлық әлеуетін ашу қажет. Қазақстандық тарап Қазақстаннан Монғолия нарығына жеткізілуі мүмкін 100 әлеуетті тауарлардың тізбесін дайындады”, – деді Асқар Мамин.
Кездесу қорытындысы бойынша Қазақстан премьер-министрі бірлескен іс-шаралар өткізу қажеттігін атап өтті. Осыған байланысты Асқар Мамин Моңғол тарапына алдағы екі жылда біздің елде Моңғолия Мәдениет күндерін және Моңғолияда да осындай іс-шараларды өткізуді ұсынды.
