Қазақстан үкіметінің басшысы Асқар Мамин біздің елімізде тіркелген Еуропалық одаққа қатысушы елдердің дипломатиялық миссияларының басшыларымен кезекті кездесу өткізді. Бұл туралы ҚР премьер-министрінің баспасөз қызметі хабарлады.
Кездесуге Орталық Азия, Ресей, ТМД, Украина, Батыс Балқан және Түркия бойынша бөлім басшылары, сондай-ақ Германия, Франция, Нидерланды, Польша, Австрия, Испания, Эстония, Италия, Латвия, Греция, Испания, Хорватия, Румыния, Словакия, Венгрия елшілері және Литва, Португалия, Болгария, Финляндия, Бельгия, Чехия өкілдері қатысты.
Кездесу барысында қатысушылар сауда-экономикалық және инвестициялық өзара іс-қимылдың өзекті мәселелерін, атап айтқанда, Еуроодақ нарығында қазақстандық өнімнің экспортын ілгерілету мәселелерін талқылады.
Сондай-ақ, тараптар ауыл шаруашылығы, энергетика, көлік, кеден және қоршаған орта салаларындағы ынтымақтастық мәселелерін қарастырды.
Асқар Мамин кездесуде сөйлеген сөзінде еліміздің Тұңғыш Президенті Нұрсұлтан Назарбаев пен мемлекет басшысы Қасым-Жомарт Тоқаев Қазақстанның негізгі сауда-экономикалық серіктестерінің бірі болып табылатын Еуроодақ елдерімен ынтымақтастықты дамыту мәселесіне ерекше назар аударатынын айтты.
“ЕО сарапшылары басқару, жекешелендіру, цифрландыру, мемлекеттік – жеке меншік әріптестік, тұрақты даму салаларындағы біздің кейбір негізгі стратегияларымыз бен құжаттарымызды әзірлеп,оны іске асыруда маңызды, қазақстандық экономиканың өсуіне және ел халқының әл-ауқатын арттыруға жәрдемдесуде үлкен рөл атқарады”, – деді Мамин.
Премьер-министр біздің Үкімет қызметінің негізгі бағыты тікелей шетелдік инвестициялар көлемінің өсуін қамтамасыз ету болып табылатынын атап өтті.
Өз кезегінде Еуроодақ елдерінің дипломатиялық миссиясының басшылары Қазақстанда бизнесті жүргізу үшін қолайлы жағдайлар бар екенін атап өтті. Сонымен қатар, Қазақстан Республикасындағы ЕуроОдақ өкілдігінің басшысы Свен-Олов Карлссон біздің ел мен ЕО арасындағы сауда-экономикалық және инвестициялық ынтымақтастық одан әрі дамитынына сенім білдірді.
