Асқар Мамин Ереванға Еуразиялық экономикалық одақтың (ЕАЭО) үкіметаралық кеңесінің отырысына келді.
Бүгін, 9 қазанда Ереванда Еуразиялық экономикалық одақтың үкіметаралық кеңесінің отырысы басталды. Оған Армения, Ресей, Қазақстан, Беларусь үкіметтерінің басшылары – Никол Пашинян, Михаил Мишустин, Асқар Мамин, Роман Головченко қатысады. Қырғызстанның өкілі Ереванға келген жоқ, бұл осы елдегі ішкі саяси жағдайға байланысты.
Үкімет басшылары Еуразиялық экономикалық интеграцияны дамытудың 2025 жылға дейінгі стратегиялық бағыттарының жобасын, трансшекаралық электрондық сауданы реттеуді, сондай-ақ Одақ актілерінің орындалу барысын талқылайды.
Кездесуге қатысушылар санитариялық-эпидемиологиялық жағдайға және Одақ елдерінде коронавирустың және басқа да инфекциялық аурулардың таралуын болдырмау жөніндегі кешенді жоспарды іске асыруға назар аударады.
Одақтың 2019 жылға арналған бюджетінің атқарылуы туралы шешім қабылдау және 2021 жылға арналған бюджет жобасын талқылау жоспарлануда.
Еуразиялық экономикалық комиссия 2018-2019 жылдары Одақтың ішкі нарығындағы алып қоюлар мен шектеулерді жою жөніндегі «жол картасын» іске асыру туралы және 2019 жылы мүше елдер арасындағы өзара сауданың жай-күйі туралы ақпарат ұсынады.
Отырыста мүше мемлекеттер тауарларының экспортын қолдаудың бірлескен шараларын пысықтау туралы шешім қабылданатын болады. Кездесуге қатысушылар өнімнің жекелеген түрлерін сәйкестендіру құралдарымен таңбалау мәселелерін талқылайды.
Сурет: zakon.kz
