Қазақстан Республикасы Парламенті Мәжілісі Еуразиялық экономикалық одақтың кедендік аумағына әкелінетін тауарларды қадағалау тетігі туралы құжатты мақұлдады. Бұл туралы ЕЭК баспасөз қызметінен хабарлады.
Қаржы министрлігінің басшысы Әлихан Смайылов атап өткендей, келісімнің басты мақсаты тауар айналымын нәтижелі бақылауды қамтамасыз ету, заңсыз айналымды анықтау, салық төлеуден жалтару үшін жағдайларды болдырмау, республикалық бюджетке салық және кеден төлемдерін арттыру болып табылады.
«Құжат ережелері ЕАЭО кедендік аумағына әкелінген тауарларды қадағалау механизмін құру мерзімі мен алгоритмін реттейді. Қадағалау импорттық тауарлар бойынша жүргізілетін болады. Бақылауға жататын тауарлардың тізімін ЕЭК Кеңесі бекітеді. Қадағалау мерзімі 5 жылды құрайды», — деп түсіндірді Смайылов.
ЕАЭО-ның әрбір елі қадағалаудың ұлттық жүйесін қалыптастыруы, сондай-ақ салық төлеушілердің осы жүйеде өзінің ілеспе құжаттарын ресімдеуін бақылауы тиіс, деді министр.
«Мұндай құжаттарды ресімдеусіз ЕАЭО аясында тауарларды өткізуге тыйым салынады. Ұлттық жүйеде мәліметтер болмаса, одақ шеңберінде қадағалауға жататын тауарларды өткізуге жол берілмейді. Ақпараттық жүйе жұмысында техникалық іркілістер немесе телекоммуникация құралдарының жұмысында бұзылулар болған жағдайлар ерекшелік болып табылады», – деп толықтырды ол.
Бұл Келісім Кеден одағына қатысушы елдер арасында бақылау бойынша деректер алмасу жөніндегі талаптарды айқындайды. Мұндай алмасу ЕАЭО интеграцияланған ақпарат формасының көмегімен тұрақты негізде жүргізілетін болады, деп нақтылады Қаржы министрі.
«Тауарлар айналымын қадағалау механизмін енгізу 2025 жылға дейін ЕАЭО сандық күн тәртібін жүзеге асыру үшін негіз қалаушы міндет болып табылады және қадам бойынша жүзеге асырылады. Келісімді бекіткеннен кейін 12 ай мерзім өткеннен кейін барлық мүше елдер пилоттық жобаны іске қосады. Оның қорытындысы бойынша қадағалау жүйесінің тұрақты жұмыс істеуіне көшу туралы шешім қабылданады», – деді Қазақстан Қаржы министрі.
Сурет: inbusiness.kz
