Энергетика министрі Қанат Бозымбаев, Энергетика министрлігінің кеңейтілген алқа мәжілісінде сөйлеген сөзінде, ағымдағы жылдың бірінші жарты жылдығында Қазақстан Орталық Азия елдеріне мұнай өнімдерін экспорттауды бастайтынын мәлімдеді.
“Ағымдағы жарты жылдықта біздің мұнай өнімдерін, негізінен Орталық Азия елдеріне экспорттауды бастау жоспарланып отыр. Заңнамалық база аяқталу сатысында. Вице-министр Ақшолақов Болат Оралұлы тиісті келісімдерді бекіту және заңнамаға өзгерістер енгізу мәселесін қатаң бақылауға алу қажет”, – деді Қанат Бозымбаев.
Министрдің мәліметінше, мұнай өңдеу көлемі, 2017 жылмен салыстырғанда, 8,6%-ға өсіп, 16,4 млн тоннаны құрады. Ағымдағы жылы 17,2 млн тоннаны қайта өңдеу жоспарлануда, бұл 2018 жылдан 5%-ға артық.
“Мұнай өнімдерінің негізгі түрлері – авиакеросин, дизель отыны, бензин, мазут өндіру көлемі 2018 жылы, 2017 жылмен салыстырғанда, 9,4%-ға өсті. Ағымдағы жылдың жоспары – 12,2 млн тонна, 2018 жылдың деңгейінен 5% өсіммен. Жыл қорытындысы бойынша нарықтың отандық мұнай өнімдерімен қамтамасыз етілуі бензин бойынша – 93,2%, дизель отыны бойынша – 91,1%, авиакеросин бойынша – 62% -ға жетті”, – деді министр.
Қанат Бозымбаев ағымдағы жылы нарық отандық бензинмен, дизель отынымен (минус 15-25 градустан басқа) және авиакеросинмен 100% қамтамасыз етілетінін айтты.
Сурет: inform.kz
