Қазақстанның қорғаныс ведомствосының ақпараттық-түсіндіру тобы Көкшетау гарнизонының аумағына жұмыс сапарымен барды. Бұл туралы ҚР қорғаныс министрлігінің баспасөз қызметі хабарлады.
Қазақстан қорғаныс министрлігінің ақпараты бойынша, жоғарыда аталған топты Қазақстан Қарулы Күштері бас штабы бастығының орынбасары генерал-майор Мұхамеджан Таласов басқарды.
Өзінің жұмыс сапары аясында ақпараттық-түсіндіру тобының мүшелері Ақмола облысының қорғаныс істері жөніндегі департаменті әскери қызметшілерінің қызмет жағдайлары мен келелі мәселелерімен танысты.
Генерал-майор Мұхамеджан Таласов әскерге шақырылушылардың ата-аналарымен жеке кездесіп, олардың барлық сұрақтарына жауап берді. Сондай-ақ, ол Көкшетау гарнизонының ағымдағы жағдайы туралы қорғаныс істері жөніндегі департамент бастығы подполковник Руслан Қасымовтың баяндамасын тыңдады.
Сол күні тағы да бірқатар іс-шаралар өтті: әскерге шақырылушыларды салтанатты шығарып салу, Бурабай кентінің Сәкен Сейфуллин атындағы орта мектебі оқушыларынан ант қабылдау, Орталық әскери оркестр мен Қазақстан Қарулы Күштерінің Ұлттық әскери-патриоттық орталығы ансамблінің концерті.
