Республиканың сыбайлас жемқорлыққа қарсы қызметінің бірінші департаментінің аса маңызды істер жөніндегі тергеушісі Данияр Биғайдаров еліміздің қорғаныс ведомствосының бірқатар қызметкерлері сыбайлас жемқорлық бойынша күдікке ілінгенін айтты. Бұл туралы “ҚазТАГ” ақпарат ресурсы хабарлайды.
Сыбайлас жемқорлыққа қарсы ведомство өкілінің айтуынша, Талдықорған гарнизонының әскери полиция штабының бастығына қатысты қылмыстық іс қозғалды.
Іс материалдарына сәйкес, әскери қызметші әскери бөлімдерде азық-түлік қызметтерін көрсету үшін кәсіпкерлік қызметті жүзеге асыруда көмек көрсеткені үшін пара алды деп күдіктелуде. Қазір сотқа дейінгі тергеудің барлық қажетті рәсімдері жүріп жатыр.
Сонымен қатар, Данияр Биғайдаровтың хабарлауы бойынша, Талдықорғанда әскери бөлімнің командирі, азық-түлік қызметінің бастығы және әскери бөлімнің тыл жөніндегі орынбасары пара алды деп күдікке ілінді.
Алдын ала мәліметтер бойынша, әскери қызметкерлер топ болып әрекет етіп, әскери бөлімдерде тамақтану қызметін көрсету бойынша кәсіпкерлік қызметті жүзеге асыру кезінде көмектескендері үшін пара алған. Сотқа дейінгі тергеу жалғасуда.
Сурет: inbusiness.kz
