ОПЕК+ бірлескен мониторинг комитетінің отырысы өтті. Отырыс қорытындысы бойынша қазақстандық тарап осы жылдың тамыз айынан бастап ОПЕК+ келісімдері негізінде мұнай өндіру деңгейін төмендету бойынша өзіне алған міндеттемелерді орындауға дайын екендіктерін білдірді . Бұл туралы Қазақстанның Энергетика министрлігінде хабарлады.
“Қазақстан өз тарапынан өзіне алған міндеттемелерді орындауға дайын. Бұған дейін ел өкілдері ОПЕК+ хатшылығына мамырдың алғашқы 12 күні Қазақстанда саланың инерттілігіне байланысты мұнай өндірудің қайта өндірісі болғанын хабарлады. ОПЕК+ келісімінің шарттарына сәйкес, мұнай өндіруді тәулігіне 9,7 млн баррельден тәулігіне 7,7 млн баррельге дейін қысқарту көзделуде”, – деп Энергетика министрлігінде мәлімдеді.
Министрлікте атап өткендей, ОПЕК+ бірлескен мониторинг комитетінің отырысы кезінде қатысушы мемлекеттердің ағымдағы жылдың маусым айындағы міндеттемелерін орындау қорытындылары қаралды.
“Қатысушылар келісімнің әлемдік мұнай индустриясына оң әсерін атап өтті”, – деп ведомствода хабарлады.
Түрлі себептермен өз міндеттемелерін толық орындай алмаған кейбір елдер бүгінгі күні мұнай өндіруді қосымша қысқартуға дайын екендіктерін растады.
Бұған дейін ОПЕК+-ке мүше мемлекеттер мұнай өндіру көлемін осы жылдың мамыр айынан шілде айына дейін тәулігіне 9,7 млн баррельге ұжымдық төмендету туралы келісімге қол қойды.
