Бүгінгі таңда Қазақстан Египет және Израильмен еркін сауда аймағын құру туралы келіссөз жүргізуде, бұл экспорт көлемін 790 миллиард долларға дейін арттыруға мүмкіндік береді. Бұл туралы Қазақстан Республикасы Сауда министрлігінің басшысы Бақыт Сұлтанов мәлімдеді.
Министр атап өткендей, қазіргі әлемде елдер арасында еркін сауда аймағын құру өңірлік сауданы дамыту тетіктерінің бірі ғана емес, оны ырықтандырудың тиімді құралы болып табылады. Ол тарифтерді өзара алып тастау арқылы тауарлар нарығына қол жеткізуді қамтамасыз етеді.
Сондай-ақ Бақыт Сұлтанов 2016 жылдан бастап Вьетнаммен осындай келісім бойынша жұмыс істеп, осы уақыт ішінде екі ел арасындағы өзара сауда 51%-ға артқанын еске салды.
“Иранмен уақытша келісім 2019 жылдың қазанынан бастап күшіне енді. Қазақстан үшін сиыр еті, өсімдік майы, кондитерлік өнімдер мен макарон өнімдеріне импорттық баж салығы төмендетілді”, – деп толықтырды министр.
Сонымен қатар, сауда министрлігі басшысы Сербия және Сингапурмен қол қойылған келісімдерді атап өтті. Соның арқасында аталған мемлекеттерге экспорттық жеткізілім көлемі артады.
Сурет: ictsd.org
