Нұр-Сұлтанда Қазақстан-Моңғол бизнес-форумы өтіп жатыр.Оған екі ел делегацияларының өкілдері, соның ішінде Қазақстан үкіметінің басшысы Асқар Мамин мен Моңғолия премьер-министрі Ухнаагийн Хурэлсух қатысады.
Сондай-ақ, бизнес-форум жұмысына қазақстандық бизнесмендер мен 25 моңғол кәсіпорындары өкілдері қатысуда. Бұл шараның басты мақсаты екі мемлекет арасындағы әріптестікті нығайту және бизнес-байланыстарды кеңейту болып табылады.
Форум барысында бүгінгі таңда 30 отандық компания өз өнімдерін Моңғолия нарығына ұсынатыны атап өтілді. Биылғы жылы Моңғол тарапына 300 қазақстандық автобус жеткізу жоспарланып отыр.
Моңғолия өз кезегінде біздің елімізге ет өнімдері мен жеңіл өнеркәсіп өнімдерін жеткізеді. Моңғолия Үкіметі басшысы елдің экономикасы жыл сайын өсіп келе жатқанын, алайда тау-кен өндіру секторында әлі де осал екенін атап өтті.
Қазақстан премьер-министрі форумда сөйлеген сөзінде, біздің еліміз екі ел арасындағы тауар айналымы көлемін таяу бес жылда 100 миллион долларға дейін жеткізбекші деп мәлімдеді.
«Қазақстан Моңғолиямен әріптестікке үлкен мән береді. Кәсіпкерлердің кездесуі екі бауырлас халықтардың жақындасуына үлкен мүмкіндік береді. Бізде инвестициялық серіктестікті дамыту бойынша үлкен жоспарлар бар. Атап айтқанда, тау-кен өнеркәсібі, логистика және ауыл шаруашылығы саласындағы жобалар табысты», — деді Асқар Мамин.
Ухнаагийн Хурэлсух Асқар Маминді тыңдап, Моңғолия үкіметі Қазақстанның ниетін жан-жақты қолдайтынын ресми түрде мәлімдеді.
«Сондай-ақ, жаңартылатын энергетикада, өнеркәсіпте, туризмде, әсіресе мал шаруашылығында әлеуетті пайдалану қажет деп санаймын. Моңғолияда шамамен 80 млн бас мал бар. Еліміздің батысында ет өңдейтін бірлескен кәсіпорын құруға болады. Өнімді тек Қазақстанға ғана емес, үшінші елдерге де жеткізуге мүмкіндік бар», – деп атап өтті Моңғолия премьер-министрі.
