Қазақстан Парламенті жоғарғы палатасының төрағасы Дариға Назарбаева Нұр-Сұлтанда ресми сапармен жүрген Өзбекстан Сенатының спикері Танзила Нарбаевамен кездесті. Бұл туралы Қазақстан Республикасы Сенатының баспасөз қызметі хабарлады.
Кездесу барысында Дариға Назарбаева бүгінгі таңда Өзбекстан еліміздің Орталық Азия өңіріндегі басты стратегиялық серіктестерінің бірі болып табылатынын атап өтті.
“Бүгінде Қазақстан-Өзбек қарым-қатынасы барлық салаларда дамудың жоғары қарқынын көрсетуде. Бұған Қазақстанның Тұңғыш Президенті Нұрсұлтан Назарбаев пен Өзбекстан президенті Шавкат Мирзиеевтің қосқан үлесі зор”, – деді Назарбаева.
Сонымен қатар, Қазақстан парламенті жоғарғы палатасының спикері Өзбекстан еліміздің басты сауда серіктесі екенін атап өтті. Оның айтуынша, өткен жылы екі мемлекет арасындағы тауар айналымы 25%-ға өсіп, 2,5 миллиард долларды құрады.
“Алға қойған ортақ мақсатқа жету үшін осы бағыттағы жұмысты жалғастырып, өзара сауда көлемін 5 млрд долларға жеткізу қажет”, – деді ол.
Қазақстан мен Өзбекстан арасындағы қарым-қатынастарды дамытудың перспективалы бағыттары туралы айта келе, Назарбаева инвестиция, энергетика және туризм салаларындағы ынтымақтастықты нығайту қажеттігін айтты. Сондай-ақ, ол екі мемлекет арасындағы өңірлік және шекаралық өзара іс-қимылды кеңейту қажет деп санайды.
Өз кезегінде, Өзбекстан Сенатының төрағасы Қазақстан Республикасы Өзбекстан Республикасының сенімді және айнымас стратегиялық серіктесі болып табылатынын мәлімдеді.
“Біздің халықтарымызды тарихи және мәдени тамырлары байланыстырады. Дамудың көптеген салалары бойынша ұқсастықтарымыз бар. Өзбекстан Қазақстанмен достық қарым-қатынасқа үлкен мән береді”, – деді Танзила Нарбаева.
Сонымен қатар, келіссөзде реформаларды құқықтық қамтамасыз ету және әлеуметтік-экономикалық даму саласында тәжірибе алмасу бағдарламаларын іске асыруға қатысты мәселелер талқыланды, сондай-ақ екіжақты шарттар мен келісімдер қабылдау және ратификациялау процестерін жеделдету мәселелері қаралды.
Кездесу соңында Қазақстан мен Өзбекстан спикерлері екі мемлекеттің Сенаты арасындағы өзара іс-қимылды дамытуға бағытталған бірлескен жол картасына қол қойды.
