Бүгін Мақтаарал ауданында Қазақстан Министрлер кабинетінің басшысы Асқар Мамин Өзбекстандық әріптесі Абдулла Ариповпен кездесті. Бұл туралы ҚР премьер-министрінің баспасөз қызметі хабарлады.
Асқар Мамин Өзбекстан Республикасының әріптесімен бірге Нұрлыжол және Өргебас ауылдарында болып, су басу салдарын жою барысын тексерді.
Екі елдің министрлер кабинеттерінің басшысы Мырзакент елді мекеніне барды. Онда премьерлер су басқан ауыл тұрғындарын қоныстандыратын жаңа шағын ауданның құрылысын тексеріп, алғашқы үйлердің іргетасын қалау рәсіміне қатысты.
Жоспарға сәйкес, Мырзакент кентінде балабақша, оқу мекемесі, фельдшерлік пункттер мен тұрғын үйлер салу жоспарлануда. Онда Жеңіс, Жанатурмыс және Достық елді мекендерінің 500 отбасы тұратын болады.
Сондай-ақ, Қазақстан мен Өзбекстан премьер-министрлері Фирдоуси ауылында болды.Онда су басу салдарынан зардап шеккендердің үйлерді жөндеу жұмыстарының жүргізілу барысын тексеріп, жергілікті тұрғындармен кездесті.
Елді мекен тұрғындарымен кездесу барысында Қазақстан премьер-министрі Республика басшысы Қасым-Жомарт Тоқаевтың тапсырмасы бойынша су тасқынынан зардап шеккен барлық азаматтарға 100 мың теңгеден материалдық көмек көрсетілетінін айтты.
