Қазақстан-Өзбекстан шекарасында орналасқан “Жібек Жолы” өткізу пунктінің жанында “Орталық Азия” халықаралық сауда-экономикалық ынтымақтастық орталығы (ХСЭЫО) салынатын жерде капсула салудың салтанатты рәсімі өтті. Рәсімге Үкімет басшысы Асқар Мамин мен өзбек Премьер-Министрі Абдулла Арипов қатысты. Бұл туралы Қазақстан Премьер-Министрінің баспасөз қызметі хабарлады.
Сондай-ақ, премьерлар келіссөз жүргізіп, елдердің өңіраралық және шекара маңындағы өзара іс-қимыл, сонымен қатар, түрлі қызмет салаларындағы ынтымақтастық мәселелерін қарастырды.
Олар автомобиль жасау, ауыл шаруашылығы өнімдерін қайта өңдеу және жоғары жылдамдықты “Түркістан-Шымкент-Ташкент” және теміржол магистралінің құрылысы бойынша бірлескен жобаларды жүзеге асыру мәселелерін талқылады. Осыдан кейін Министрлер Кабинетінің басшылары «Орталық Азия» ХСЭЫО қызметін ұйымдастыру іс-шаралар жоспарына және теміржол көлігін дамытуға қатысты бірлескен іс-қимылдар туралы хаттамаға қол қойды.
“Қазақстан мен Өзбекстан үкіметтері өзара сауда деңгейін 10 млрд долларға дейін жеткізу міндеті бойынша жұмыс істеуде. Бүгін басталатын жоба осы мақсатқа қол жеткізуге қызмет етіп, екі мемлекеттің жан-жақты стратегиялық ынтымақтастығын одан әрі нығайтуға ықпал ететін болады”, – деп атап өтті Асқар Мамин.
Жұмыс сапары барысында Қазақстан Үкіметінің басшысы Қазақстан-Өзбекстан шекарасындағы жаңартылған “Б.Қонысбаев” өткізу пунктінде болды. Оның қайта жаңғыртылуы өткен жылдың желтоқсан айында аяқталды, нәтижесінде құрылыс алаңы 2 есе 6 га-ға дейін, қозғалыс жолақтарының саны 6-ға дейін, паспорттық бақылау кабиналарының саны 16-ға дейін өсті, сондай-ақ өткізу пунктінде заманауи инспекциялық-тексеру кешендері пайда болды. Модернизациядан кейін оның өткізу қабілеті екі бағытта да тәулігіне мың көлікке дейін, 6 еседен астам өсті, ал өту уақыты бір сағаттан 25 минутқа дейін қысқарды.
