Индустрия министрлігі өзбекстандық тарап біздің мемлекетке Үшқұдық — Қызылорда көлік дәлізін құруды қарастыратын жобаны жүзеге асыруды ұсынатынын мәлімдеді. Бұл туралы lsm.kz жаңалықтар ресурсы хабарлайды.
Индустрия министрлігі өкілдерінің айтуынша, бұл жобаны іске асыру Орталық Азия елдерін Ресеймен біртұтас артерия ретінде біріктіруге мүмкіндік береді.
Қазақстан жағынан әлеуетті дәліз алдын ала Қызылорда маңындағы Самара — Шымкент автожолынан басталып, Мәдениет, Жаңаталап елді мекендері арқылы Қызылорда облысы Жалағаш ауданы Аққыр ауылына дейін жалғасады. 53 шақырымдық бұл жерлер жөндеуді қажет етеді.
Сондай-ақ, көлік дәлізін құру үшін Аққыр ауылынан Өзбекстан шекарасына дейін ұзындығы 130 шақырым болатын жаңа жол салу қажет.
Өзбекстанға шекарадан Кокаяз елді мекеніне дейін 16 шақырым автожол салу қажет болады. Одан әрі Көкаяз кентінен Үшқұдық қаласына дейін асфальтталған жол бар. Оның ұзындығы — 188 шақырым.
Индустрия министрлігі Өзбекстан Республикасымен көлік дәлізін құру туралы мәселе Қызылорда — Жезқазған — Павлодар — Ресей шекарасы халықаралық дәлізінің бөлігі болып табылатын Қызылорда — Жезқазған автомобиль жолын қайта жаңарту аяқталғаннан кейін ғана қаралатынын ерекше атап өтті.
Ведомствода Өзбекстан тарапы ұсынған жобаны іске асыру үшін кем дегенде 83 миллиард теңге инвестиция қажет болатынын қоса айтты.
