Екі бауырлас мемлекет — Қазақстан мен Қырғызстанның мемлекеттік шекарасында әлі күнге дейін жүк автокөліктерінің километрлік кептелісі тұр. Қазіргі уақытта «Ақ-тілек — автожол» өткізу пунктінің алдында 140 фур тұр. Бұл туралы Қырғызстан мемлекеттік шекара қызметінің баспасөз қызметі хабарлады.
Қырғызстан шекарашылары атап өткендей, мұндай кезек қазақстандық мемлекеттік кіріс комитеті қызметкерлерінің қосымша тексеруінен туындады.
Атап айтқанда, біздің республикамызда тауарлар транзитінің мониторингі мақсатында жүк машиналарына орнатылатын арнайы электрондық пломбалар енгізілді. Алайда кейбір жүргізушілерде пломбалар жоқ, километрлік кезектің себебі осы болып отыр.
Жүк фурлары жүргізушілерінің айтуыншша, бүгінгі таңда жүк иелері оларды ілеспе құжаттармен қамтамасыз еткенін күтіп отыр. Сонымен қатар, олар қазіргі уақытта кабиналарда тұрып жатқанын айтты. Олар тамақ сатып алу немесе кезектің жылжуы туралы білу қажет болғанда оны тастап кетуге мәжбүр.
Бұған дейін Қырғыз Республикасы Үкіметінің басшысы Мұхаммедқали Әбілғазиев уәкілетті органдарға Қазақстан өкілдерімен туындаған мәселені шешуді тапсырған.
