Қазақстан Түркияға экологиялық таза ауыл шаруашылығы өнімдерін экспорттауды бастайтын ниеті туралы мәлімдеді. Бұл туралы Қазақстанның Түркиядағы сауда-экономикалық миссиясы кезінде мәлім болды.
Сондай-ақ, елдер машина жасау, қара металлургия, химия өнеркәсібі және фармацевтика салаларындағы екіжақты ынтымақтастықты кеңейтуді жоспарлап отыр.
Қазақстан мен Түркия өкілдерінің кездесуінде сауда-экономикалық саланы одан әрі дамытудың сызбасын жасады. Іс-шара индустрия және инфрақұрылымдық даму министрлігінің, Қазақстанның Түркиядағы елшілігінің және Қазақстанның «Атамекен» Ұлттық кәсіпкерлер палатасының қолдауымен өтті. Қазақстандық делегация құрамына 35 кәсіпкер кірді.
«Мемлекет бизнесмендердің алдына жаңа мақсаттар қойып отыр. Олардың бірі – шетелдік инвестицияларды тарту, сондай-ақ экспорттық әлеуетті арттыру. Біз осы кездесуден жақсы нәтиже аламыз деп үміттенеміз», — деді Қазақстанның Түркиядағы Елшісі Абзал Сапарбеков.
Өткен жылы екі ел арасындағы тауар айналымы 1 миллиард 900 миллион долларды,ал ағымдағы жылдың басынан бері 944 миллион долларды құрады. Қазақстан мен Түркия кәсіпкерлері бұл көрсеткішті кем дегенде екі есеге көтеруге ниет білдірді.
«Қазақстан мен Түркия қазірдің өзінде 20-ға жуық келісімге қол қойды. Олардың арасында Түркияның сауда компаниялары ғана емес, өнеркәсіптік компаниялар да бар. Бүгінде екі ел арасында машина жасау, ауыл шаруашылығы және тамақ өндірісі сияқты салалар белсенді дамуда», – деді «Атамекен» ҚР ҰКП төрағасының орынбасары Нұралы Бөкейханов.
Сурет: 24.kz
