Біздің республикада темір жол саласы құрамдауыштарын өндіру бойынша Қазақстан мен Румынияның бірлескен машина жасау кәсіпорындары құрылатын болады. Бұл туралы Қазақстан Республикасының Румыниядағы Төтенше және Өкілетті Елшісі Нұрбах Рүстемов Қазақстан СІМ-де өткен баспасөз мәслихатында айтты.
Қазақстан дипломатының айтуынша, бірлескен машина жасау кәсіпорындарын құру туралы келісімге Бухарест Сауда-өнеркәсіп палатасы өкілдерімен келіссөздер қорытындысы бойынша қол жеткізілді.
Сондай-ақ, біздің державаның елшісі Румыния еліміздің Оңтүстік-Шығыс Еуропадағы басты сауда серіктесі болып табылатынына назар аударды. Рүстемов осы жылдың 9 айында екі мемлекет арасындағы тауар айналымының көлемі шамамен 1,4 миллиард долларды құрағанын атап өтті.
Сонымен қатар, Қазақстан дипломаты Румыния президенті Клаус Йоханниске сенім грамоталарын салтанатты тапсыру рәсімінде, осы елдің басшысы біздің республикамызбен екіжақты ынтымақтастықты нығайтудың маңыздылығын атап өткенін айтты.
Сурет: nv.ua
