ЕАЭО шеңберінде вакцинациялаудың жалпы паспорттарын енгізе ме? Бұл сұраққа Қазақстан мен Ресей СІМ басшылары жауап берді, деп «ҚазАқпарат» ХАА хабарлайды.
Екі елдің сыртқы саяси ведомстволары басшыларының келіссөздерінің қорытындысы бойынша баспасөзге шығу барысында журналистер ЕАЭО елдерінің вакцинация паспорттары енгізіле ме, сондай-ақ Одақ мүшелерінің паспорттары бір-бірінен таныла ма деген сұрақ қойды.
«Қазіргі уақытта әлемнің барлық мемлекеттерінде паспорттар (вакцинация) бойынша бірыңғай тәсіл жоқ. Бірақ біздің кеңістігімізде Еуразиялық Даму Банкі вакциналауды сандық бақылау бойынша платформа құрды. Бізде ПТР тестілеу бақылау платформасы бар. Біз бұл мәселені Сергей Викторовичпен (Лавровпен) талқыладық — осы платформаларды біріктіру туралы», — деді Премьер-Министрдің орынбасары — ҚР Сыртқы істер министрі Мұхтар Тілеуберді.
Өз кезегінде Ресей Федерациясының Сыртқы істер министрі Сергей Лавров бұл мәселемен санитарлық билік, яғни эпидемиологиялық жағдайды жақсы түсінетіндер айналысатынын атап өтті.
«Вакциналық төлқұжаттар туралы әңгімелер ұзақ уақыт бойы жалғасып келеді, олар алғаш рет Еуропалық Одақта басталды, содан кейін бұл пікірталас пен қарама-қайшылықты пікірлер тудырды, өйткені бұған жол берілмеуі керек, және мен вакциналық төлқұжаттардың адамның қозғалу құқығын шектеуімен келісемін. Бізге ЕАЭО шеңберінде жүріп-тұру құқығын шектемейтін жалпы ережелерді әзірлеу қажет және бұл вакциналық паспорттарды басқаша атаған дұрыс шығар, олар тек бір ғана мақсатқа-осы құжат иесінің денсаулық жағдайын көрсетуге тиіс», – деп түсіндірді Сергей Лавров.
