1-30 қараша аралығында Ресей Федерациясы мен Қазақстан Республикасының шекарасында, Шанхай Ынтымақтастық Ұйымына қатысушы президенттер Кеңесінің шешіміне сәйкес, “Ынтымақтастық — 2019-2021″атты бірлескен шекаралық операцияның екінші кезеңі өтеді. Бұл туралы Ресейдің ФСБ шекара басқармасының баспасөз қызметі хабарлады.
Қорған және Түмен облыстары бойынша Ресей Федералдық қауіпсіздік қызметінің Шекара басқармасымен бірге операцияға осы екі облыстың Ресей Федерациясы ФҚҚ өңірлік басқармаларының, сондай-ақ Қазақстанның Қостанай және Солтүстік Қазақстан облыстары бойынша Ұлттық қауіпсіздік комитетінің Шекара қызметі департаментінің өкілдері қатысатын болады.
Қатысушылар террористік және діни-экстремистік әрекетке, сондай-ақ қылмыстық әрекетті ұйымдастыруға ықтимал қатысы бар адамдарды мемлекеттік шекара мен өткізу пунктінде анықтауға бағытталған жедел, әскери, режимдік-өткізу және профилактикалық іс-шаралардың тұтас кешенін өткізуге ниетті.
Бұдан басқа, қару-жарақтың, оқ-дәрілердің, диверсия және террор құралдарының, есірткі және психотроптық препараттардың мемлекеттік шекара арқылы заңсыз орын ауыстыруының жолын кесуге бағытталған іс-шаралар жүргізіледі.
Мұндай операцияға қатысу халықаралық терроризм, сепаратизм және экстремизм көріністеріне, сондай-ақ ұйымдасқан трансшекаралық қылмыс қызметіне қарсы күрес жөніндегі дағдыларды арттыруға, мемлекеттік шекара режимін қамтамасыз ету үшін Ресей шекара басқармасының серіктестерімен Қазақстан тарапының ынтымақтастығының нысандары мен тәсілдерін жақсартуға мүмкіндік береді.
Сурет: zen.yandex
