Қазақстан Республикасының Президенті Қасым-Жомарт Тоқаев Ресей Федерациясының басшысы Владимир Путинмен телефон арқылы сөйлесті. Бұл туралы Қазақстан басшысының ресми порталы хабарлады.
Әңгіме аясында екі ел Президенттері екіжақты ынтымақтастықтың өзекті мәселелерін қарастырды. Сондай-ақ, тараптар Қазақстан мен Ресейдің халықаралық бірлестіктер мен интеграциялық ұйымдар желісі бойынша әріптестік аспектілері жөнінде пікір алмасты.
Таулы Қарабақтағы жағдайға ерекше назар аударылды. Қазақстан басшысы Ресей Федерациясы мен Владимир Путиннің Әзірбайжан Республикасы мен Армения арасындағы қақтығыс аймағындағы атысты және кез келген әскери іс-қимылды тоқтатуға бағытталған келісімге қол жеткізудегі делдалдық рөлін жоғары бағалады.
“Ресейдің белсенді қолдауымен қол жеткізілген Таулы Қарабақ төңірегіндегі соғыс қимылдарын тоқтату туралы келісім-бұл көпжылдық қақтығыста қажетті бітімді қамтамасыз ететін өте маңызды шешім. Мүдделі тараптардың бірлескен мәлімдемесінің ережелерін сақтайтынына сенім білдіремін”, – деді Тоқаев.
Бұған дейін Армения, Әзірбайжан және Ресей арасында Таулы Қарабақтағы әскери қақтығысты тоқтату туралы құжатқа қол қойылғаны хабарланған болатын.
Сурет: ru.sputnik.kz
