Қазақстандық Каспий теңізінің акваториясында Қазақстан әскери-теңіз күштері мен Ресейдің әскери-теңіз флотының бірлескен теңіз оқу-жаттығулары өтуде. Бұл туралы “Батыс” өңірлік қолбасшылығы әскерлерінің қолбасшысы басқармасының баспасөз қызметі хабарлады.
Ведомствоның ақпараты бойынша, бірлескен оқу-жаттығуларды Қазақстан әскери-теңіз күштерінің бас қолбасшысы контр-адмирал Сәкен Бекжанов басқарады.
Оқу-жаттығу барысында арнайы операцияны ұйымдастыру және жауынгерлік іс-қимылдарды жүргізу мәселелері пысықталатын болады. Сондай-ақ екі бауырлас мемлекеттің әскери теңізшілері кемелердің бірлескен маневрлеу элементтерін орындайды және кеме топтамасының барлық түрлерін жүргізеді.
Бұл оқу-жаттығулардың басты міндеті екі ел штабтарының іс-қимылдарының үйлесімділігін, сондай-ақ әскери офицерлердің дайындық деңгейін тексеру болып табылады. Оқу-жаттығу барысында Қазақстан әскери-теңіз күштері мен Ресейдің әскери-теңіз флотының біріккен топтарының бірлескен іс-қимылдарын жүргізудің жаңа түрлері мен тәсілдеріне ерекше назар аударылатын болады.
Сурет: Inform.kz
