Малайзияның іскер топтары өкілдері ресми сапармен республикамыздың оңтүстік астанасына барды. Бұл туралы Қазақстанның сыртқы саяси ведомствосының баспасөз қызметі хабарлады.
Малайзия өкілдерінің сапарын Қазақстан Республикасының Куала-Лумпурдағы елшілігі ұйымдастырып, Қазақстан-Малайзия Іскерлік кеңесі қолдады.
Малайзия делегациясының құрамына “Малайзияның халықаралық шағын және орта бизнес сауда қауымдастығының” президенті Меган Су, WashuppTech Sdn Bhd, YSL Industrial Automation Sdn Bhd, Alpha One Formula Sdn Bhd, Delstasia Sdn Bhd, Quality Food Industries Sdn Bhd және Peterson Projects and Solutions Sdn Bhd компанияларының өкілдері кірді.
Малайзиялық тарап сапары аясында қазақстандық мемлекеттік құрылымдар, даму институттары, ұлттық компаниялар басшылары, шағын және орта бизнес өкілдерімен бірқатар кездесулер өткізді.
Малайзиядан келген қонақтар инвестициялық мүмкіндіктермен, еліміздің экспорттық, туристік және транзиттік-көліктік әлеуетімен танысты. Сондай-ақ, малайзиялық тарап Қазақстанның бизнес-климатты жақсарту және инвестициялық жобаларды іске асыру бойынша қабылдаған шараларымен танысты.
Сапар соңында “Малайзияның шағын және орта бизнес халықаралық сауда қауымдастығы” мен Алматы Кәсіпкерлер палатасы арасында ынтымақтастық туралы меморандумға қол қойылды.
Екі мемлекеттің іскер топтарының өкілдері Қазақстан мен Малайзия арасындағы сауда-экономикалық және инвестициялық ынтымақтастықты кеңейтуге бағытталған бірлескен жол картасын әзірлеуге келісті.
