Палата спикері Нұрлан Нығматулиннің төрағалығымен өткен Мәжілістің жалпы отырысында Қазақстан мен Солтүстік Македония арасындағы сотталған азаматтармен өзара алмасу туралы шартты ратификациялау мақұлданды. Бұл туралы zakon.kz ақпарат агенттігі хабарлайды.
Бас прокурордың орынбасары Марат Ахметжанов елдер арасында қылмыстық саладағы шарттардың толық пакеті қабылданғанын мәлімдеді. Оның айтуынша, бұл Келісім қылмыстық жауапкершілікке тарту үшін іздеуде жүрген адамдарды ұстап беруге және экстрадициялауға қатысты туындайтын мәселелерді реттеуге мүмкіндік береді. Сонымен қатар, ол Македонияда біздің елімізден қылмыстық жауапкершіліктен құтылуға тырысып, құқық қорғау органдарынан қашып жүрген адамдар жоқ екенін айтты.
“Бізде де бұл елдің органдары іздеп жатқан адамдар жоқ. Жалпы, келісім типтік болып табылады”, – деп атап өтті Бас прокурордың орынбасары.
Ахметжанов шартты ратификациялау Қазақстанда қылмыс жасаған және Солтүстік Македонияда жасырынған қаскүнемді экстрадициялауға мүмкіндік беретінін, мұндай мүмкіндік екі бағытта да жұмыс істейтінін атап өтті.
Біздің еліміз 20 мемлекетпен осындай келісімге қол қойды.
Сурет: ru.depositosphotos.com
