Қазақстанның сыртқы саяси ведомствосы басшысының орынбасары Роман Василенко Италияның Сыртқы істер және халықаралық ынтымақтастық министрінің орынбасары Манлио Ди Стефаномен екіжақты кездесу өткізді, деп хабарлайды Қазақстан Республикасы Сыртқы істер министрлігінің баспасөз қызметі.
Қазақстан сыртқы саясат ведомствосының ақпараты бойынша, бұл кездесу Италия Сыртқы істер министрлігі басшысы орынбасарының біздің Республикамыздың астанасына сапары аясында өтті.
Келіссөз барысында дипломаттар 2009 жылғы 5 қарашада Римде қол қойылған біздің ел мен Италияның стратегиялық серіктестік туралы екі жақты шартты табысты жүзеге асыру мәселелерін талқылады.
Екі мемлекеттің сыртқы саяси ведомстволарының өкілдері Қазақстан мен Италия арасындағы саяси өзара іс-әрекетті кеңейтуге қатысты мәселелерді қарастырды. Сондай-ақ, әлемдік аренадағы ынтымақтастық мәселелеріне назар аударылды.
Тараптар қарым-қатынастарды дамытудың перспективалы бағыттарына қатысты, біздің республикамыз бен Италия арасындағы сауда-экономикалық және инвестициялық ынтымақтастықты нығайту қажет деген ортақ пікірге келді.
Сонымен қатар, кездесу аясында Италия Сенаты депутаттары Қазақстан мен Еуропалық Одақтың кең ауқымды ынтымақтастығы туралы келісімдерді ратификациялауы оң аталып өтті.
Сурет: mfa.gov.kz
