Қазақстанның Сыртқы істер министрі Бейбіт Атамқұлов Германияға жұмыс сапары аясында Германия Федеративтік Республикасының (ГФР) сыртқы саяси ведомствосының басшысы Хайко Мааспен кездесті. Бұл туралы еліміздің Сыртқы істер министрлігінің баспасөз қызметі хабарлады.
Кездесу барысында Қазақстан мен Германия арасындағы ынтымақтастықты одан әрі дамыту мәселелері талқыланды. Атамқұлов Герман бизнесмендері біздің шикізаттық емес секторға инвестиция салып, өзара ынтымақтастықты нығайта түсетінін айтты.
“12 жыл ішінде Қазақстанға ГФР-дан 8,6 миллиард доллар көлемінде тікелей инвестициялар тартылды. ГФР-дан еліміздің экономикасына инвестициялардың 90%-дан астамы шикізаттық емес секторға тиесілі. Бұл машина жасау, қайта өңдеу өнеркәсібі, химия саласы. Германия біз үшін-ерекше серіктес. Біз ынтымақтастығымызды барынша қарқынды өсіруді жоспарлап отырмыз”, – деді Қазақстан Сыртқы істер министрі.
Сондай-ақ, әңгіме барысында Қазақстанның сыртқы саяси ведомствосының басшысы Германия еліміздің басты экономикалық әріптестерінің бірі екенін хабарлады. Өз кезегінде Германияның Сыртқы істер министрі германдықтардың Қазақстан Республикасымен одан әрі ынтымақтастыққа қызығушылық танытатынын мәлімдеді.
“Біздің елге келгеніңізге өте қуаныштымыз. Біз бүгін саясат, экономика және мәдениет саласындағы екіжақты ынтымақтастықты қалай кеңейте аламыз деген мәселені талқылаймыз. Қазақстан біз үшін Орталық Азиядағы өте маңызды серіктес.Еуропаның бұл аймаққа жылдан жылға қызығушылығы кеңейіп келеді.Оны Еуроодақ 2 ай бұрын қабылдаған ОА елдеріне қатысты жаңа стратегиясынан түсінуге болады”, – деді Хайко Масс.
