Қазақстан мен Беларусь Президенттері Қасым-Жомарт Тоқаев пен Александр Лукашенко кеңейтілген құрамда келіссөздер өткізді. Бұл туралы Ақорданың баспасөз қызметі хабарлады.
Кездесу барысында екі елдің Президенттері екіжақты күн тәртібіндегі бірқатар мәселелерді талқылады. Атап айтқанда, Тоқаев пен Лукашенко сауда-экономикалық өзара іс-қимылды арттыру перспективаларын қарастырып, саяси, мәдени-гуманитарлық салалардағы және халықаралық құрылымдар аясындағы ынтымақтастық мәселелерін талқылады.
Біздің республика Президенті Қазақстан екі ел арасындағы сауда көлемін ұлғайтуға, гуманитарлық саланы нығайтуға және халықаралық ұйымдар аясында одан әрі белсенді өзара іс-қимыл жасауға мүдделі екенін мәлімдеді.
Келіссөз соңында Қазақстан мен Беларусь Президенттері екі мемлекет арасындағы екіжақты ынтымақтастықты дамытуға, әріптестікті одан әрі жандандыруға және халықаралық аренадағы іс-қимылды үйлестіруге бағытталған бірлескен мәлімдемеге қол қойды.
Сондай-ақ Қасым-Жомарт Тоқаев пен Александр Лукашенко Қазақстан мен Беларусь үкіметтері арасындағы көші-қон саласындағы ынтымақтастық туралы келісімге, Қазақстан Республикасының Бас прокуратурасы мен Беларусь Республикасының тергеу комитеті арасындағы ынтымақтастық туралы келісімге, Қазақстандық Ұлттық қауіпсіздік комитеті мен Беларусь Президенті жанындағы жедел-техникалық саладағы Беларусь жедел-талдау орталығы арасындағы ынтымақтастық және өзара іс-қимыл туралы келісімге қол қойды.
Екі мемлекет басшылары Қазақстан мен Беларусь сыртқы істер министрліктері арасындағы 2020-2021 жылдарға арналған ынтымақтастық жоспарына, жылжымайтын мүлікті мемлекеттік тіркеу мәселелері бойынша Қазақстан Республикасының әділет министрлігі мен Беларусь Республикасының мүлік жөніндегі мемлекеттік комитеті арасындағы келісімге, сондай-ақ Қазақстан цифрлық даму, инновация және аэроғарыш өнеркәсібі министрлігі мен Беларусь ұлттық ғылым академиясы арасындағы жерді қашықтықтан зондпен тексеру деректерімен алмасу саласындағы ынтымақтастық туралы келісімге қол қойды.
Қасым-Жомарт Тоқаев жоғарыда көрсетілген қол қойылған құжаттар Қазақстан мен Беларусь арасындағы екіжақты ынтымақтастықты кеңейтудегі маңызды қадам болып табылатынын мәлімдеді.
Өз кезегінде Александр Лукашенко екі мемлекеттің қарым-қатынас деңгейі Қазақстан Республикасы мен Беларусь Республикасының стратегиялық мүдделеріне сәйкес келетінін атап өтті.
«Бұл болашаққа үлкен жоспарлар құруға мүмкіндік беретін көп жылдық жұмыстың нәтижесі. Минск пен Нұр-Сұлтан арасында барлық деңгейдегі өзара іс — қимылдың оң тәжірибесі орнықты», — деді Беларусь басшысы.
