Қазақстан Үкіметі басшысы Асқар Мамин инвестициялық ахуалды жақсарту жөніндегі кеңес отырысын өткізді. Бұл туралы ҚР премьер-министрінің баспасөз қызметі хабарлады.
Өткізілген отырыс шеңберінде киберқауіпсіздікті қамтамасыз етуге және киберқылмыспен күресуге қатысты мәселелер қаралды.
Қазақстан премьер-министрі отырыста сөйлеген сөзінде 2017 жылы іске қосылған «Цифрлық Қазақстан» мемлекеттік бағдарламасына назар аударды. Асқар Маминнің айтуынша, осы бағдарламаның арқасында энергетика, көлік, ауыл шаруашылығы және қызмет көрсету секторларында айтарлықтай нәтижелерге қол жеткізілді, бұл республиканың ұлттық экономикасының өсуі үшін маңызды фактор болды.
Сонымен қатар, үкімет басшысы ағымдағы жылдың 9 айында Қазақстан Республикасының ЖІӨ 4,3%-ға артқанын атап өтті. Мамин өсімнің негізгі үлесі құны жоғары салалар мен қызметтерге тиесілі екенін айтты.
«Оң динамиканы одан әрі қамтамасыз ету үшін біздің экономикамызды халықаралық және жергілікті киберқылмыс қатерлерінен қорғауға күш салу қажет. Дүниежүзілік экономикалық форумның болжамына сәйкес 2022 жылға қарай әлемдік экономикаға киберқылмыстан келетін залал 8 триллион доллардан асуы мүмкін», — деді премьер-министр.
Министрлер кабинетінің басшысы отырысқа қатысушыларды біздің елімізде Тұңғыш Президент Нұрсұлтан Назарбаевтың бастамасы бойынша «Қазақстанның киберқалқаны» тұжырымдамасы әзірленгені туралы хабардар етті.
Отырыс соңында Асқар Мамин инвестициялық ахуалды жақсарту жөніндегі кеңеске қатысушы шет елдердің өкілдерін киберқауіпсіздікті қамтамасыз ету саласындағы өзара іс-қимылды жандандыруға шақырды.
