Қазақстанның оңтүстік Америка елдерімен сыбайлас жемқорлыққа қарсы іс-қимыл мәселелері бойынша ынтымақтастығын кеңейту жолындағы алғашқы ел Бразилия болды, деп «ҚазАқпарат» ХАА ҚР Сыбайлас жемқорлыққа қарсы іс-қимыл агенттігінің баспасөз қызметіне сілтеме жасап хабарлайды.
Алик Шпекбаев Қазақстанда жүргізіліп жатқан сыбайлас жемқорлыққа қарсы реформаларды талқылап, Бразилия Федеративтік Республикасының Төтенше және Өкілетті Елшісі Рубем Антонио Корреа Барбозамен кездесті. Саяси жаңғыртуға, парламентаризмді дамытуға және Мемлекет басшысының Жолдауында айтылған бастамаларға ерекше назар аударылды.
Сондай-ақ, Бразилия елшісіне халықаралық стандарттарды имплементациялау бойынша, соның ішінде сыбайлас жемқорлық фактілері туралы хабарлаған адамдарды қорғаудың кешенді жүйесін қалыптастыру, мемлекеттік қызметшілер мен олардың жұбайлары үшін шетелдік юрисдикциялардағы активтерді иеленуге тыйым салу, заңсыз баю үшін жауапкершілік енгізу бойынша Антикор қабылдаған шаралар туралы ақпарат берілді.
Өз кезегінде Корреа Барбоза мырза бұл елші болып тағайындалған сәттен бастап оның Қазақстандағы мемлекеттік органға алғашқы сапары екенін атап өтті, сондай-ақ өз елінің сыбайлас жемқорлыққа қарсы саясатының институционалдық негіздері туралы егжей-тегжейлі айтып берді.
Бразилияның сыбайлас жемқорлыққа қарсы іс-қимыл жүйесіне 5 негізгі субъект кіреді: бас бақылаушы, федералды полиция, Федералды есеп палатасы, қоғамдық министрлік және қаржылық қызметті бақылау кеңесі.
Қазақстан тарапының ерекше қызығушылығын әлемге әйгілі «ашықтық порталы» — ресми Мемлекеттік ресурс тудырды, онда федералдық бюджет пен Штаттар бюджеттерінің шығыстарының баптары, елдің саясаткерлері мен шенеуніктерінің декларациялары, сондай-ақ азаматтар мен БАҚ-тың қызығушылығын тудыратын бірқатар өзге қаржылық ақпарат орналастырылған. Елшінің айтуынша, портал бюджет қаражатының жұмсалуын қоғамдық бақылаудың қуатты құралына айналды және оның арқасында мемлекеттік аппараттың шығыстары 25% — ға қысқарды. Ресурс мүмкіндіктерінің мысалы ретінде елші мырза осы ресурста тіпті оның жалақысының орналастырылғанын атап өтті.
Кездесу соңында тараптар одан әрі ынтымақтастық, оның ішінде құзыретті органдармен ынтымақтастық және сыбайлас жемқорлыққа қарсы іс-қимылда өзара қолдау көрсету туралы уағдаласты.
