Қазақстанның ішкі істер министрлігінің 105 бөлімшесі жойылып, ІІМ органдары мен бөлімшелерінің саны 10 мыңнан астам бірлікке қысқарды. Бұл 2019-2021 жылдарға арналған ішкі істер органдарын жаңғырту бойынша Жол картасы аясында жасалды. Бұл туралы Ішкі істер министрлігінің баспасөз қызметі хабарлады.
Министрлікте қысқарту басшыларға да қатысты болғанын, 1180 басшы лауазым қысқартылғанын хабарлады. Сондай-ақ, мамандандырылған күзет қызметі күзететін 32 нысан бәсекелестік ортаға берілді. Ішкі істер министрлігі қызметкерлерінің айтуынша, полицейлердің саны орташа еуропалық деңгейге дейін қысқарды.
Осы қысқартулар арқылы үнемделген барлық қаражат құқық қорғау қызметі қызметкерлерінің жалақысын арттыруға бағытталды. Яғни, патрульдік полиция қызметкерлерінің жалақысын 65%-ға, жедел қызметкерлер мен тергеушілерге 55%-ға, учаскелік полиция инспекторларына және жоғары оқу орындарының оқытушыларына 25%-ға, өзге қызметкерлерге 20%-ға арттырды.
Сонымен қатар, тұрғын үй үшін өтемақы алатын полиция қызметкерлерінің тізімі кеңейтілді. Енді тұрғын үй үшін өтемақы алуға учаскелік, кәмелетке толмағандар істері жөніндегі инспекторлар,сондай-ақ патрульдік полиция қызметкерлері құқылы.
Сурет: Zakon.kz
