Қазақстанның стратегиялық жоспарлау және реформалар жөніндегі агенттігінің басшысы, “Астана” ХҚО басқарушысы Қайрат Келімбетов Ұлттық халық санағы ағымдағы жылдың қазан айында өтетінін айтты, деп хабарлайды “ҚазАқпарат” жаңалықтар порталы.
Ұлттық халық санағы процесіндегі жаңашылдық – заманауи сандық технологиялар мен рәсімдерді автоматтандыру болып табылады. Сондай-ақ, енді тұрғындар саны туралы ақпарат жинау екі тәсілмен жүргізілетін болады.
“Бірінші әдіс – мамандандырылған sanaq.gov.kz сайтында интернет-сауалнама жүргізу, ол виртуалды көмекшінің көмегімен респонденттерге, қай жерде болса да, өздігінен санақ жүргізуге және өзіне және отбасы мүшелеріне санақ парақтарын толтыруға мүмкіндік береді. Екіншісі – онлайн-режимде санақтан өтпеген респонденттер арасында қажетті санитарлық нормаларды сақтай отырып, дәстүрлі жаппай аралау жүргізілетін болады. Бұл шараларды қазан айында өткізу жоспарланып отыр”, – деді Келімбетов.
Сондай-ақ Үкімет Қазақстан халқының санағын әзірлеу мен өткізуге байланысты мәселелерді шешу үшін арнайы комиссия құруды белгіледі. Мәселелерді орталық, сол сияқты жергілікті атқарушы билік органдары реттейтін болады.
“Үйді аралау 1-30 қазан аралығында өтеді. Ұлттық санақты өткізу жөніндегі іс-шаралар жоспарын іске асыру мақсатында Премьер-Министрдің бірінші орынбасары Смайыловтың төрағалығымен арнайы комиссия құру туралы Премьер-Министр өкімінің жобасы әзірленіп, мүдделі мемлекеттік органдар мен облыстардың әкімдіктеріне келісуге жіберілді. Арнайы комиссияның бірінші отырысын 10 ақпанда өткізуді ұсынамыз”, – деп түйіндеді ҚР Стратегиялық жоспарлау және реформалар жөніндегі агенттігінің төрағасы.
Сурет: news.myseldon.com
