Қазақстанның Қырғызстандағы Төтенше және Өкілетті Елшісі Қайрат Нұрпейісов Қырғыз Республикасы Парламентінің Спикері Дастан Жұмабековпен екіжақты кездесу өткізді.
Өткен кездесуде біздің республикамыз бен Қырғызстан арасындағы саяси, экономикалық және мәдени-гуманитарлық ынтымақтастыққа қатысты мәселелер қарастырылды. Сондай-ақ парламентаралық қатынастарды нығайтуға қатысты мәселелерге де назар аударылды.
Осы мүмкіндікті пайдалана отырып, қырғыз парламентінің басшысы қазақстандық елшіні Қырғызстандағы дипломатиялық миссиясының басталуымен құттықтап, бауырлас екі мемлекет арасындағы өзара іс-қимылдың одан әрі кеңеюіне үміт білдірді.
«Қырғызстан мен Қазақстан арасында туысқандық және ізгі қарым-қатынас орнағаны Қазақстан Республикасының Тұңғыш Президенті Нұрсұлтан Назарбаевтың үлкен еңбегі. Көрші республиканың қазіргі басшысы Қасым-Жомарт Тоқаев қалыптасқан белсенді ынтымақтастық дәстүрін жалғастыра отырып, жақын арада Қырғызстанға мемлекеттік сапармен келуге ниетті. Біз бұл сапар екі халықтың игілігі үшін белгіленген мақсаттарды іске асыруға жаңа серпін беретініне сенеміз», — деді Дастан Жұмабеков.
Екі жақты сауда-экономикалық өзара іс-қимылды нығайту туралы айта келе, Қырғызстан парламентінің басшысы екі ел арасындағы тауар айналымының көлемін бір миллиард долларға дейін арттыруға назар аударды.
«Қазақстан мен Қырғызстан арасындағы ынтымақтастық үлкен әлеуетке ие. Бірақ, қазіргі уақытта 12 бақылау-өткізу пункттерінің 8-і ғана жұмыс істейді, қалған 4-і тоқтап тұр. Оның ішінде бірінші кезектегі мақсаттардың бірі Талас облысындағы Кіші-Капка БӨП жұмысын жаңарту болып табылады. Осыған байланысты, дипломатиялық миссияңыздың аясында Сіз осы мәселелерді шешуде күшіңізді салатыныңызға үміттенемін», — деді ол.
Өз кезегінде қазақстандық дипломат Дастан Жұмабековке кездесу үшін алғысын білдіріп, Қазақстан мен Қырғызстан арасындағы достық қарым-қатынастар мен екі жақты ынтымақтастықты одан әрі дамыту үшін бар күш-жігерін салатынын мәлімдеді.
