Қазақстанның Литвадағы төтенше және өкілетті елшісі Виктор Темірбаев Вильнюс университетінде болды,деп хабарлайды ҚР сыртқы саяси ведомствоның баспасөз қызметі.
Сапар барысында қазақстандық дипломат Вильнюс университетінің ректоры Артурас Жукаускаспен кездесті. Әңгіме барысында Қазақстан мен Литва арасындағы білім және ғылым саласындағы ынтымақтасу мүмкіндіктері талқыланды.
Сондай-ақ, тараптар Қазақстан президенті Қасым-Жомарт Тоқаевтың еліміздің халқына Жолдауының негізгі аспектілерін қарастырды. Сонымен қатар, ректорға еліміздегі International Education Fair 2019 білім беру көрмесіне бару ұсынылды.
Бұдан кейін Қазақстан елшісі Вильнюс университетінің филология факультеті мен Азия елдері институтының профессор-оқытушылар құрамымен кездесті.
ҚР СІМ ақпараты бойынша, кездесуде академиялық байланыстарды дамыту перспективалары қаралды. Сонымен қатар, факультет декандары мен оқытушылары 2020 жылға жоспарланған Абай Құнанбаевтың 175 жылдық мерейтойы және әл-Фарабидің 1150 жылдығы мерекелері туралы хабардар болды.
Сурет: Mfa.gov.kz
