Бүгін Қазақстанның Сингапур Республикасындағы елшісі Әркен Арыстанов Сингапур Президенті Халима Якобқа сенім грамоталарын тапсырды. Бұл туралы ҚР сыртқы істер министрлігінің баспасөз қызметі хабарлады.
Кездесу барысында тараптар Қазақстан Президенті Нұрсұлтан Назарбаев пен Сингапурдың бірінші премьер-министрі Ли Куан Ю белгілеген достық қарым-қатынастарды қолдаудың маңыздылығын атап өтті.
Қазақстандық дипломат Қазақстан президенті Қасым-Жомарт Тоқаевтың құттықтау хатын және ізгі тілектерін жеткізді.
Тараптар екіжақты құқықтық базаны нығайту қажеттігін атап өтті, инвестицияларды көтермелеу және өзара қорғау туралы келісімнің күшіне енуінің маңыздылығын, сондай-ақ ағымдағы жылдың соңына дейін ЕАЭО-ға қатысушы елдер мен Сингапур арасындағы келіссөз үдерісін аяқтауды талқылады.
Сингапур Президенті Қазақстан елшісін қызметке кірісуімен құттықтады және Қазақстан үкіметімен белсенді диалогқа дайын екендігін мәлімдеді.
Сурет: zakon.kz
