Қазақстанның Сауд Арабиясындағы төтенше және өкілетті елшісі Берік Арын Сауд ауыл шаруашылығы және мал шаруашылығы инвестициялық компаниясының (SALIC) басшысы Мэттью Дженсенмен кездесті. Бұл туралы ҚР сыртқы саяси ведомствосының баспасөз қызметі хабарлады.
ҚР Сыртқы істер министрлігінің ақпараты бойынша, кездесу барысында қатысушылар біздің ел мен осы компания арасындағы ынтымақтастық мәселелерін талқылады. Сонымен қатар Қазақстанға Сауд инвестицияларын тарту мүмкіндіктері қаралды.
Кездесу барысында Қазақстан елшісі Сауд компаниясының басшысына еліміздің агроөнеркәсіп саласы және «Астана»қаржы орталығының қызметі туралы айтты. Өз кезегінде SALIC басшысы Қазақстан Республикасымен өзара тиімді ынтымақтастыққа мүдделі екенін мәлімдеді.
Кездесу қорытындысы бойынша тараптар елімізде бар инвестициялау мүмкіндіктерін қарастыру үшін Сауд компаниясы делегациясының Қазақстанға сапарын ұйымдастыру туралы уағдаласты.
