Қазақстан Республикасының Ресейдегі Төтенше және Өкілетті Елшісі Ермек Көшербаев Ресей сыртқы саяси ведомствосының өкілдерімен кездесті, деп хабарлайды бауырлас елдегі Қазақстан елшілігінің баспасөз қызметі.
Бастапқыда Қазақстан дипломаты Ресей Сыртқы істер министрінің орынбасары Андрей Руденкомен кездесіп, оған сенім грамоталарының көшірмесін табыс етті.
Бұдан кейін Қазақстан Республикасының елшісі Ресей дипломатиялық ведомствосының басшысы Сергей Лавровпен кездесу өткізді, оның барысында Қазақстан-Ресей қарым-қатынастарына байланысты мәселелер қаралды.
Ермек Көшербаев пен Сергей Лавров бауырлас екі мемлекет арасындағы ынтымақтастықты нығайтуға қатысты мәселелерді талқылады, сонымен бірге интеграциялық құрылымдар аясында Қазақстан мен Ресейдің өзара іс-әрекеттерін дамыту мәселелеріне назар аударды.
Сондай-ақ кездесу барысында қазақстандық дипломат пен Ресейдің Сыртқы істер министрі өңірлік және халықаралық проблематиканың өзекті мәселелерін қозғады.
Қазақстан елшілігінің ақпараты бойынша, Ермек Көшербаев Қазақстанның Ресейдегі Елшісі қызметіне осы жылдың 29 қаңтарында Президент Қасым-Жомарт Тоқаевтың Жарлығымен тағайыналды.
Сурет: kazembassy.ru
