Қазақстан Республикасының Кувейт қаласындағы Төтенше және Өкілетті Елшісі Дәулет Ембердиев Кувейт Әмірі шейх Сабах әл-Ахмад әл-Джабер Ас-Сабахқа сенім грамоталарын тапсырды, деп хабарлады Қазақстанның Сыртқы істер министрлігі.
Кездесу барысында қазақстандық дипломат Кувейт әміріне Тұңғыш Президент Нұрсұлтан Назарбаев пен мемлекет басшысы Қасым-Жомарт Тоқаевтың құттықтау сөзін жеткізді. Сонымен қатар, ол біздің республикамыз Кувейтпен екіжақты ынтымақтастықты дамыту ниетін растады.
Кувейт басшысы президент Тоқаевтың жолдауының негізгі бағыттары мен еліміздің транзиттік-көліктік әлеуетін жақсартуға және шетелдік инвестицияларды тартуға бағытталған шаралары туралы хабардар етілді.
Сонымен қатар, кездесуде осы жылдың 1 қазанынан бастап Кувейт азаматтары үшін визасыз режим енгізілгені айтылды. Бүгінгі күні ынтымақтастықты кеңейтуге қатысты екі елдің басшылығы инвестициялық өзара іс-қимылды нығайту үшін қажетті жағдайлар жасайды.
Кездесу соңында Кувейт басшысы Қазақстанның қарқынды дамуын атап өтіп, ынтымақтастықты дамыту ниетін айтты, сондай-ақ елшіге дипломатиялық миссиясында табыс тіледі.
Сурет: mfa.gov.kz
