Қазақстанның Біріккен Араб Әмірліктеріндегі (БАӘ) төтенше және өкілетті елшісі Мадияр Менилбеков премьер-министрдің орынбасары, БАӘ Президенті істері министрін қоса атқарушы шейх Мансур бен Заид Әл Нахаянмен кездесу өткізді. Бұл туралы ҚР сыртқы саяси ведомствосының баспасөз қызметі хабарлады.
Кездесу барысында қатысушылар бұрын жоспарланған іс-шаралар мен сапарларды ұйымдастыруға қатысты мәселелерді қарастырды. Сонымен қатар, осы жылдың қыркүйек айында өтетін Абу-Дабидегі үкіметаралық комиссияның кезекті раундын өткізуге ерекше көңіл бөлінді.
Сондай-ақ, кездесу кезінде қазақстандық елші біздің еліміз инвестициялар саласындағы бұрын қол жеткізілген уағдаластықтарды жүзеге асыруға қолдау көрсетуге дайын екенін мәлімдеді. Осыған байланысты тараптар келесі жылы Қазақстан мен БАӘ үшін тарихи оқиға болатын «Абу Даби Плаза» кешенінің ресми ашылуы өтетінін атап өтті.
Кездесу соңында біздің елші әмірлік тарапқа Нұр-Сұлтан қаласындағы шейх Фатима бинт Мүбарак атындағы № 84 мектеп-лицейінде араб тілін оқыту орталығын ашқаны үшін алғыс білдірді.
