Қазақстанда электр энергетикасын дамыту бойынша ұлттық жобаны іске асыру жоспарлануда, деп хабарлады вице-премьер Роман Скляр.
«Мемлекеттік жоспарлау жүйесін қайта қарау шеңберінде Үкімет салаларды дамытуға және мемлекеттік саясаттың стратегиялық мақсаттарына қол жеткізуге бағытталған ұлттық жобаларды әзірлеуді жоспарлап отыр. Осы жұмыс аясында басым міндеттердің бірі электр энергетикасын дамыту бойынша ұлттық жобаны әзірлеу болып табылады, ол Қазақстан Республикасы Президентінің Ұлттық жобалар тізбесін бекіту жөніндегі Жарлығының жобасына енгізілген», — деп хабарлады Скляр Мәжіліс депутаттары тобының сауалына жауап бере отырып.
Оның айтуынша, ұлттық жоба электр энергетикасын, оның ішінде электр энергиясын өндіру, берілісін және жабдықтау секторларын, жылумен жабдықтау саласын және электр энергиясы нарығын одан әрі дамыту міндеттерін шешуге бағытталатын болады.
«Ұлттық жоба аясында базалық және маневрлік генерацияны дамыту, қолданыстағы электр желісі инфрақұрылымын күшейту және жаңа құрылыс салу, жаңартылатын және баламалы энергия көздерін кеңейту, сандық және ең озық қолжетімді технологияларды енгізу, нарықтық қатынастарды және электр энергетикасында тариф белгілеу тетіктерін жетілдіру бойынша шаралар анықталатын болады», — деп толықтырды вице-премьер.
Ол қазір Үкімет «Қазақстан Республикасының кейбір заңнамалық актілеріне жаңартылатын энергия көздерін пайдалануды қолдау және электр энергетикасы мәселелері бойынша өзгерістер мен толықтырулар енгізу туралы» 2020 жылғы 7 желтоқсандағы Заңмен бекітілген аукциондық сауда-саттықта жобаларды іріктеу жолымен генераторлық қондырғыларды салу тетіктерін пысықтап жатқанын атап өтті.
«Сонымен қатар, 2035 жылға дейін энергетикалық теңгерім әзірлеу бойынша жұмыс жүргізілуде, Қазақстан Республикасының біртұтас электр энергетика жүйесінде оңтүстік аймақты күшейту, кейін Батыс өңірлер арасындағы электр байланыстарын күшейту бойынша шаралар қабылданатын болады» — деді Скляр.
