Қазақстандық сыртқы саяси ведомство басшысының орынбасары Роман Василенко ЕҚЫҰ-ға қатысушы елдердің Сыртқы істер министрлері кеңесінің кезекті отырысына қатысты. Бұл туралы ҚР Сыртқы істер министрлігінің баспасөз қызметі хабарлады.
Отырысқа қатысушылар алдында сөз сөйлеген Роман Василенко дау-жанжалды жағдайларды болдырмауға бағытталған ЕҚЫҰ-ға қатысушы елдердің үйлестірілген әрекетін жүзеге асыруды жалғастырудың маңыздылығына назар аударды.
Сондай-ақ, кездесу барысында оның қатысушыларына біздің Республикамыздың Тұңғыш Президенті Нұрсұлтан Назарбаевтың Азиядағы өзара іс-қимыл және сенім шаралары жөніндегі кеңеспен ЕҚЫҰ ынтымақтастығын кеңейтуге байланысты бастамасы ұсынылды. Елбасы бастамасының басты мақсаттарының бірі Еуразия кеңістігіндегі қауіп-қатерлерге қарсы күрес саласындағы халықаралық ұйымдардың синергиясын дамыту болып табылады.
Бұдан басқа, ЕҚЫҰ елдерінің Сыртқы істер министрлері кеңесінің отырысы аясында Ауғанстандағы жағдайға көңіл бөлінді. Атап айтқанда, Нұр-Сұлтанда “Ауғанстан және ЕҚЫҰ: әріптестік пен ынтымақтастық үшін мүмкіндіктер жасау” тақырыбы талқыланған дөңгелек үстелдің табысты өткені атап өтілді.
Кездесу барысында ЕҚЫҰ-ға қатысушы елдер арасындағы тұрақты өзара байланысты талдау және зерттеулермен айналысатын ЕҚЫҰ-ның Тақырыптық орталығын құру туралы қазақстандық бастама айтылды.
Сурет: mfa.gov.kz
