Қазақстанның Үндістандағы төтенше және өкілетті елшісі Ерлан Әлімбаев жұмыс сапарымен Үндістанның Гуджарат штатында болды. Бұл туралы Қазақстан Республикасының сыртқы саясат ведомствосының баспасөз қызметі хабарлайды.
Қазақстан сыртқы істер министрлігінің ақпараты бойынша, Гуджарат штаты ауыл шаруашылығы қарымымен және Үндістанда ашылған бірінші GIFT city халықаралық қаржы орталығымен танымал болды.
Жұмыс сапары кезінде қазақстандық дипломат Үнді штатының бас министрі Виджай Рупанимен кездесті, сондай-ақ Гуджарат Сауда-өнеркәсіп палатасының және үнділік бірқатар жетекші компанияларының басшыларымен келіссөз жүргізді.
Сонымен қатар, Ерлан Әлімбаев өзінің сапары аясында жетекші “Таймс оф Индия” баспа басылымына, әлемдік “Дурдаршан” теледидар агенттігіне және “Гуджарат ТВ”телеарнасына сұхбат берді. Атап айтқанда, елші Қазақстан мен Үндістан арасындағы екіжақты ынтымақтастықты дамыту перспективалары туралы айтып, Президент Тоқаевтың жолдауының негізгі аспектілерімен таныстырды.
Елші жұмыс сапарының соңында Қазақстанның Мумбай мен Гандинагардағы құрметті консулдарымен, Үндістандағы Kazakh Invest өкілдерімен келіссөздер жүргізді. Осы кездесулерде Махараштра мен Гуджарат штаттарында республикамыздың экономикалық мүдделерін ілгерілету бойынша нақты ұсыныстар айқындалды.
