Қазақстандық дәрігерлер делегациясы Мәскеуге жұмыс сапарымен барып, онда қаланың жетекші медициналық мекемелерінде болды, деп хабарлайды Мәскеу Денсаулық сақтау департаментінің баспасөз қызметі.
Ресей астанасына сапары кезінде қазақстандық мамандар Мәскеудің «Воронов» жұқпалы аурулар клиникалық орталығында, телемедицина орталығында, Склифосовский атындағы институтта, Пучков атындағы жедел және шұғыл жәрдем станциясында болды.
Мәскеулік медициналық мекемелерді аралау барысында біздің дәрігерлер ресейлік әріптестерінің коронавирус инфекциясын жұқтырған пациенттерге көрсетіліп жатқан медициналық көмекті көріп, емдеу схемалары және хаттамаларымен танысты.
Мәскеу Денсаулық сақтау департаменті басшысының орынбасары Алексей Токаревтің айтуынша, Қазақстан дәрігерлерінің сапары халықаралық деңгейде тәжірибе алмасу жұмысының бірі болып табылады.
Бұған дейін Қостанай облысына мәскеулік дәрігерлер тобы келгені хабарланған. Оны Склифосовский атындағы институттың төтенше жағдайларда жұмыс істеу үшін мамандандырылған медициналық көмек бригадасының меңгерушісі Олег Черныш басқарады. Ол ресейлік дәрігерлер өңірге сапары аясында қазақстандық әріптестеріне кеңес беріп, дәрістер өткізетінін және пациенттерді емдеуге қатысатынын атап өткен.
Сурет: sputniknews.kz
