Бүгін сегіз ай Ливанда болған Қазақстанның үшінші бітімгершілік ротасы Отанына оралды, деп хабарлайды еліміздің қорғаныс ведомствосының баспасөз қызметі.
Қорғаныс министрлігінің ақпараты бойынша, Ливанда біздің әскери қызметшілер Үнді бітімгершілік батальонының құрамында болды және өңірдегі қауіпсіздікті қолдауға бағытталған тапсырмаларды орындады.
Қазақстандық бітімгерлердің міндеттері: бекеттердегі кезекшілік, жергілікті жерді торуылдау және халыққа көмек көрсету болды.
Отанына оралған бітімгерлермен кездесу кезінде десанттық-шабуылдау әскерлері қолбасшысының орынбасары полковник Бауыржан Артықов әскери қызметшілердің жауынгерлік даярлық деңгейін жоғары бағалап, олар өз міндеттерін лайықты орындағанын мәлімдеді.
Сонымен қатар, полковник Бауыржан Артықов жақында Ливанға аттанған бітімгерлердің төртінші ротасы да Қазақстан Республикасы Қарулы Күштері әскери қызметшілерінің даңқын жоғары көтеретініне сенім білдірді.
Қорғаныс ведомствосы Біріккен Ұлттар Ұйымының бітімгершілік миссияларына Қазақстанның қатысуы – біздің республикамыздың халықаралық аренадағы сыртқы саяси қызметінің маңызды салаларының бірі екенін атап өтті.
Сурет: mod.gov.kz
