Желіде “2021-2023 жылдарға арналған республикалық бюджет туралы” Заң жобасы жарияланды, онда Байқоңыр ғарыш айлағында “Бәйтерек” жаңа зымыран кешенін құруды қаржыландыру туралы айтылған, деп хабарлайды lsm.kz жаңалықтар ресурсы.
Байқоңырдағы жаңа зымыран кешенінің құрылысы Қазақстан мен Ресейдің бірлескен жобасы болып табылады. Осы жылдың 30 шілдесінде тиісті келісімге қол қойылды.
Заң жобасында көрсетілгендей, “Бәйтеректі” жасауға қазақстандық тарап 89,1 миллиард теңге жұмсай алады. Бұл зымыран кешенінің жерүсті инфрақұрылымы объектілерін салуға жұмсалатын шығыстар.
Ресей Федерациясы “Бәйтерек” құрылысы туралы шартқа сәйкес, “Союз-5” зымыран-тасығышын жасау және Байқоңырға тасымалдауды қаржыландыратын болады. Алдын ала мәліметтер бойынша, Ресей бұл мақсатқа бір миллиард доллар немесе 420 миллиард теңгеден астам жұмсайды.
Бұған дейін “Роскосмос” мемлекеттік корпорациясының өкілі Анатолий Красников “Бәйтерек” Қазақстан мен Ресейдің ұлттық бағдарламаларының мүддесі үшін пилотсыз ғарыш аппараттарын ұшыру үшін ғана емес, халықаралық ғарыш нарығында ұшыру қызметтерін көрсету үшін де пайдаланылатынын, бұл белгілі бір уақыт ішінде зымыран кешені құрылысының шығынын өтеуге мүмкіндік беретінін айтқан болатын
Сурет: camonitor.kz
