Бүгін Қазақстан Республикасының Президенті Қасым-Жомарт Тоқаев Иран Ислам Республикасының Президенті Хасан Руханимен телефон арқылы сөйлесті. Бұл туралы Қазақстан президентінің баспасөз қызметі хабарлады.
Сөйлесу барысында Қазақстан мен Иран Президенттері екі ел арасындағы қарым-қатынастарға, соның ішінде сауда-экономикалық өзара іс-қимылды дамытуға қатысты мәселелерге баса назар аударды.
Иран басшысының айтуынша, оның елі біздің республикамен өзара сауда көлемін арттыруға мүдделі және ол “Қазақстан – Түрікменстан – Иран” темір жолының әлеуетін және Каспий теңізі арқылы мультимодальды дәліздерді пайдалану қажет деп санайды.
Қазақстан Президенті, өз кезегінде, екіжақты экономикалық ынтымақтастықты жандандыру үшін, екі елдің үкіметтері сәйкес шараларды әзірлеу қажет екенін атап өтті.
Сондай-ақ, телефон арқылы сөйлесу барысында Қасым-Жомарт Тоқаев пен Хасан Рухани Қазақстан мен Иранның коронавирусқа қарсы әрекет етуге бағытталған шараларын қарастырды.
Иран басшысы Қазақстан Республикасының инфекция жағдайларын тіркеуді тұрақтандыруға мүмкіндік жасаған, коронавирус инфекциясымен күресуге бағытталған іс-әрекеттерін жоғары бағалады.
Телефон сұхбатының соңында Иран президенті Қасым-Жомарт Тоқаевты Тегеранға ресми сапармен келуге шақырды.
Сурет: inform.kz
