Еліміздің басшысы Қасым-Жомарт Тоқаев жаңа сайланған Парламенттің бірінші сессиясын өткізу туралы Жарлыққа қол қойды. Бұл туралы Ақорданың баспасөз қызметі хабарлады.
Жарлыққа сәйкес, өткен парламенттік сайлаудан кейінгі бірінші сессия ертең, 15 қаңтарда өтеді.
Қазіргі сайлау науқанында депутаттық мандаттар үшін бес саяси партия: Nur Otan, «Ақ жол», Халық партиясы, «Ауыл» және «Адал» күресті.
Соңғы қорытындыға сәйкес, 2021 жылғы сайлауда, 71,09% дауыс жинаған Nur Otan жеңіске жетті. Онымен бірге Мәжіліске «Ақ жол» (10,95%) және ҚХП (9,1%) кірді.
Қалған партиялар — «Ауыл» және «Адал» — Мәжіліске кіру үшін 7 пайыздық кедергіні еңсере алмады. Сарапшылардың пікірінше, бұл саяси бірлестіктердің сайлау науқанын бастауды ұзаққа созғанына байланысты.
Сайлау қорытындысы бойынша нұротандықтар — 76, ақжолдықтар — 12, ал халықтықтар -10 мандат алды. Парламенттің төменгі палатасының құрамына барлығы 107 депутат кіреді, оның ішінде 9 Мәжіліс мүшесі Қазақстан халқы Ассамблеясынан сайланды.
Сурет: inform.kz
