Мемлекет Басшысы Қасым-Жомарт Тоқаев Қазақстанның қалалары мен өңірлерінің әкімдерімен онлайн-кеңес өткізді, деп хабарлайды ҚазАқпарат.
Президентке әкімдер жалпы Қазақстан Республикасындағы эпидемиологиялық жағдай тұрақтанғанын айтты, бұған сырқаттану көрсеткішінің 23%-ға төмендеуі, төсек-орындармен қамтылудың 43%-ға азаюы және сауыққан азаматтар санының 63%-ға дейін артуы дәлел.
Сондай-ақ, әкімдер Қасым-Жомарт Тоқаевқа елімізде төсек орындары мен қажетті дәрі-дәрмектердің қоры құрылғанын баяндады.
Әкімдердің баяндамаларын тыңдағаннан кейін, Қазақстан басшысы оларға коронавирустық инфекцияға байланысты жағдайды қатаң бақылауда ұстауды тапсырды.
Сонымен қатар, Қасым-Жомарт Тоқаев белгіленген карантин талаптарын сақтаудың маңыздылығын айтып, әкімдерге халыққа түсіндіру жұмыстарын жүргізуді жалғастыруды тапсырды.
Бүгінгі таңда Қазақстанда коронавирустық инфекцияны жұқтыру оқиғаларының саны 84648 құрайды. Республикамызда 54404 адам аурудан айықты.
Сурет: inform.kz
